EFENDIJA BURDŽOVIĆ: TIJESNE CIPELE
Mogu da shvatim da neko nosi i podnosi tijesne cipele koje ga žuljaju jer ih je papreno platio, a bačene pare su u današnjem društvu neoprostiv poraz. Radije će pristati da ga žuljaju nego da mu se podsmijevaju za bačene pare.
Ono što ne shvatam je: Zašto bi neko pristao da mu bude tijesno u životu, a svi ga dobijamo besplatno? Zar je tako “skupo” odreći se načina života koji boli, žulja, ograničava slobodu? Vjerovatno jeste.
Svjesno ili nesvjesno, prihvatamo da nas žulja mišljenje okruženja, a što je najgore, prihvatamo da mjera našeg (ne)uspjeha bude mišljenje okruženja.
Da uspijemo u onome što želimo, možda je najpametnije da sazujemo tijesne cipele, da se oslobodimo tog nesrećnog.
Jedan mladić je došao kod mudrog čovjeka i tražio od njega da mu da ključ uspjeha. Mudrac ga je doveo do korita punog vode, potopio mu glavu u njega i silom ga držao pod vodom dok nije počeo da se guši i otima. Kad ga je nakon kraće agonije pustio da udahne vazduha, pitao ga je: “Šta si vidio? Jesi li vidio ključ na dnu korita?” Mladić zadihan je odgovorio: “Ne, nisam vidio ništa, borio sam se da se istrgnem i dođem do vazduha”. Mudrac je odgvorio: “Ključ ti je tu. Kad se budeš borio za uspjeh kao što si se borio za vazduh, uspjećeš”.
EFENDIJA BURDŽOVIĆ: TIJESNE CIPELE
Naravoučenije je: Dok se boriš za vazduh, najmanje razmišljaš o tome šta okruženje misli o tebi.
Allah Milostivi svome miljeniku Muhammedu, sallaAllahu ‘alejhi ve sellem Kur'anom savjetuje: “A kada se odlučiš, u Allaha se pouzdaj”. Nije mu rekao: “Anketiraj javno mnjenje, analiziraj šta misli okruženje”. Pouzdaj se u Allaha, On će ti pomoći kad niko ne bude mogao, On te neće ismijavati ako ne uspiješ.
A ljudi?
Uvijek će biti dobrih ljudi koji će vas isto poštovati i kad različito mislite. Borite se za svoje snove kao za vazduh, ali u snovima ostavite mjesta za ljude koji vas vole. Najbliži ste svom, kada se iskreno radujete tuđem uspjehu. To je radost koja oslobađa tjeskobe. Ako vas ta radost košta ugleda u očima gunđala i zanovijetala kojima sve smeta, sjetite se: Mišljenja takvih su samo… tijesne cipele.
Enis Burdžović
Povezani članci
HAOS ŠIROM EVROPE PRIPREMAJU SE ZA TEŠKE NEPOGODE: U NAREDNA DVA DANA BIĆE KRITIČNO
OSNOVNA ŠKOLA “RISTO RATKOVIĆ” U PRIPČIĆIMA U KATASTROFALNOM STANJU: OBRUŠIO SE DIO PLAFONA
BJELOPOLJCU ODREĐENO ZADRŽAVANJE: PRIJETIO SUPRUZI DA ĆE JE UBITI