BULATOVIĆ: IMALI SMO 17 UTAKMICA BEZ PORAZA

BULATOVIĆ: IMALI SMO 17 UTAKMICA BEZ PORAZA

Ekonom fudbalskog kluba Jedinstvo, sportista Goran Bulatović prisjeća se svojih početaka, sportskih uspona i padova. Fudbal je počeo da igra davne 1975. godine, a on je dan danas ostao je prepoznatljiv po svojim sportskim uspjesima.

,,Fudbalom sam počeo da se bavim od malih nogu, zajedno sa društvom iz komšiluka. Trenirao sam u pionirima Jedinstva, igrali smo utakmice između sebe, kao predigra seniorima Jedinstva. Tada je Jedinstvo igralo u drugoj ligi bivše Jugoslavije” priča on.

Kasnije je sa svojim timom u Ivangradu igrao revijalnu utakmicu-sjever protiv srednje regije u kategoriji pionira. Izgubili su 3:1, s tim što su protivnici bili stariji po dvije godine od njihove ekipe, kaže Goran.

,,Tada sam igrao još kao pionir u prvoj ekipi Tekstilca, pokojni Juka me stavio da igram zadnjeg igrača zbog iskustva. Tu me je primijetio selektor svih mlađih kategorija CG Vlatko Vujošević. Svake godine kada smo imali januarski raspust pioniri su išli na pripreme, selektor me je tražio, ali ja nisam išao. Zbog čega, ni sam nisam znao”, istakao je Bulatović.

Kako on navodi, imali su dobru ekipu, pojačani sa 4 igrača iz Mojkovca, u tadašnjoj omladinskoj ligi imali su 17 utakmica bez poraza.

,,Za seniore sam počeo da igram kad sam bio u drugi razred gimnazije. Derbi mi je bio protiv Zabjela na gradskom stadionu, te godine sam igrao i protiv Jedinstva koje je upadalo u drugu ligu, Izgubili smo 2:0. U ekipi sam igrao srednjeg veznog, po desnoj strani, davao sam golove, ali sam više asistirao jer sam imao dobre napadače. Sa fudbalskim klubom tekstilac dva puta sam igrao finale kupa CG”, naveo je buvši sportista.

Prema njegovim riječima imao je prekide u svojoj karijeri, ali kako kaže i dalje je pri fudbalskom klubu Jedinstvo kao ekonom.

,,Fudbal sam zavolio preko mog oca Vukašina Bulatovića (Tala), koji je bio ekonom i trener mlađih kategorija u Fk Tekstilac. On je zajedno sa tadašnjim direktorom kombinata Momom Vlaovićem osnovao 1963. Tekstilac. Vodio me je uvijek sa sobom na treninge i utakmice i od tada moja ljubav prema tom sportu ne jenjava. Više ne igram fudbal zbog godina”, zaključuje Bulatović.

Inače, u mlađim danima imao je ponude od Jedinstva, Sutjeske i Partizana. Najveći razlog zašto nije nastupio za te klubove leži u porodici koju nije htio da napusti, a najveći razlog od svih, kako dodaje za kraj, jeste njegova majka.

*Sponzor teksta Mesopromet Franca